ราชา อาห ภนฺเต นาคเสน ตุมฺเห ภณถ กินฺติ อิทญฺจ ทุกฺขํ นิรุชฺเฌยฺย
อญฺญญฺจ ทุกฺขํ น อุปฺปชฺชเยฺยาติ กึ ปฏิกจฺเจว วายามิเตน นนุ มฺปตฺเต กาเล
วายามิตพฺพนฺติ ฯ สมฺปตฺเต กาเล มหาราช วายาโม อกิจฺจกโร ภวติ ปฏิกจฺเจว วายาโม
กิจฺจกโร ภวตีติ ฯ อุปมํ ภนฺเต กโรหีติ ฯ ตํ กึ มญฺญสิ มหาราช ยทา ตฺวํ
ปิปาโส ภเวยฺยาสิ ตทา ตฺวํ อุทกฏฺฐานํ ขณาเปยฺยาสิ โปกฺขรณึ ขณาเปยฺยาสิ ตฬากํ
ขณาเปยฺยาสิ ปานียํ ปิวิสฺสามีติ ฯ น หิ ภนฺเตติ ฯ เอวเมว โข มหาราช สมฺปตฺเต
กาเล วายาโม อกิจฺจกโร ภวติ ปฏิกจฺเจว วายาโม กิจฺจกโร ภวตีติ ฯ ภิยฺโย อุปมํ
กโรหีติ ฯ ตํ กึ มญฺญสิ มหาราช ยทา ตฺวํ ภตฺเตํ พุภุกฺขิโต ภเวยฺยาสิ ตทา เขตฺตํ
กสาเปยฺยาสิ สาลึ โรเปยฺยาสิ วีชํ การาเปยฺยาสิ ธญฺญํ อติอาหเรยฺยาสิ ยวํ โรเปยฺยาสิ
ตํ ภตฺตํ ภุญฺชิสฺสามีติ ฯ น หิ ภนฺเตติ ฯ เอวเมว โข มหาราช สมฺปตฺเต กาเล
วายาโม อกิจฺจกโร ภวติ ปฏิกจฺเจว วายาโม กิจฺจกโร ภวตีติ ฯ ภิยฺโย อุปมํ
กโรหีติ ฯ ตํ กึ มญฺญสิ มหาราช ยทา เต สงฺคาโม ปจฺจุฏฺฐิโต ภเวยฺย ตทา
ตฺวํ ปริกฺขํ ขณาเปยฺยาสิ ปาการํ การาเปยฺยาสิ โคปุรํ การาเปยฺยาสิ อทฺทาลกํ
การาเปยฺยาสิ ธญฺญํ จ อภิหราเปยฺยาสิ ตทา ตฺวํ หตฺถิสฺมึ สิกฺขาเปยฺยาสิ อสฺสสฺมึ
สิกฺขาเปยฺยาสิ รถสฺมึ สิกฺขาเปยฺยาสิ ธนุสฺมึ สิกฺขาเปยฺยาสิ ถรุสฺมึ สิกขฺขาเปยฺยาสีติ ฯ
น หิ ภนฺเตติ ฯ เอวเมว โข มหาราช สมฺปตฺเตต กาเล วายาโม อกิจฺจกโร ภวติ
ปฏิกจฺเจว วายาโม กิจฺจกโร ภวตีติ ฯ ภาสิตํ เจตํ มหาราช ภควตา
ปฏิกจฺเจว ตํ กยิรา ยํ ชญฺญา หิตมตฺตโน
น สากฏิกจินฺตาย มนฺตาธีโร ปรกฺกโม
ยถา สากฏิโก ปสตฺถํ สมํ หิตฺวา มหาปถํ
วิสมํ มคฺคมารุยฺห อกฺขจฺฉินฺโนว ฌายติ
เอวํ ธมฺมา อปกฺกมฺม อธมฺมมนุวตฺติย
มนฺโท มจฺจุมุขํ ปตฺโต อกฺขจฺฉนฺโนว ฌายตีติ ฯ
กลฺโลสิ ภนฺเต นาคเสนาติ ฯ

ปฏิกจฺเจววายามกรณปญฺโห ปญฺจโม ฯ

ราชา อาห ภนฺเต นาคเสน เอวํ วจนํ ตุมฺเห ภณถ ปกติอคฺคิโต เนรยิโก